شو قالت ستي؟ قصيدة من ترشيح الاخ ناصر عتيق

قالت ستي
وقت الكباب سكروا
الباب
ووقت المجدرة نادوا
للمعترة

قالت ستي
ابن آدم نصو خلقة ونصو خرقة
ويلي ما بتزينو عروقو ما بيتزينو خروقو

قالت ستي
البخيل متل الكديش
بيحمل دهب وبياكل حشيش
اي نعم

قالت ستي…
خدي الفارس
ولا تاخدي الدارس

قالت ستي …
العشرة يلي هانت
ياريتها ما كانت..!

قالت ستي..
اللي بيعاتب الرخيص
بيرخص

قالت ستي
الأصيل أصيل ولو حظو على قدو
وإبن النعمة مبين ولو الزمن هدو

قالت ستي
مو كل ورد خلق للشم
ولا كل البشر بتنفدى بالدم

قالت ستي
قالتلا ياجارة سكبيلي .. ردت عليها بكفوفي ولا بصحونك الي ع رفوفي

قالت ستي
لا تضرب وتغمق الجرح
مابعد العداوة إلا الصلح

قالت ستي
ناموا عندي ليلة
فكروا حالهم من العيله

قالت ستي
بنت الأصل
بتخلي كوخها قصر

قالت ستي
خليكي عند أهلك عزيزة وشبعي دلال
صح كتار الشوارب بس قليلين الرجال

قالت ستي
قبل ماتركبي لأذانك حلق روحي ركبي لتمك غلق

قالت ستي …
ماصفي حدا صالح
كل الناس مصالح

قالت ستي…
الله يكفينا شر من رحب فينا وهلا
ومن ورانا حكى علينا وما خلا

قالت ستي
الغربة متل الحمام العمومي … الي برا حيموت ليدخل، والي جوا موطايق الريحة…..

قالت ستي
شيل الريحانه وشمها
وخود البنت على ريحة أمها

قالت ستي…
يلي ألو غايب
بضل قلبو دايب

قالت ستي…
الست مالها غير صحتها
لارجال بيشفع ولا أولاد بتنفع

الله يرحمك يا ستي.